დემოკრატიული პარტიების კოორდინაციას იხილავთ და ვერც „ნაციონალური მოძრაობა“ და ვერც „ლელო“ ვერ გაეკარება, - ამის შესახებ „ფედერალისტების“ ლიდერმა, ოპოზიციის სამომავლო გეგმებზე საუბრისას „პალიტრანიუსის“ გადაცემაში „360 გრადუსი“ განაცხადა.

თამარ ჩერგოლეიშვილის თქმით, ოლიგარქიულ ძალებს „ფედერალისტების“ მხრიდან ლეგიტიმაცია არ ექნებათ.

“„რვიანი“ აღარ არსებობს. ბოიკოტისთვის იყო და ბოიკოტის არარელევანტურობასთან ერთად „რვიანიც“ არარელევანტური გახდა. იმ „რვიანში“ იყო „დროა“, ვისთანაც მშვენიერი საქმიანი ურთიერთობა გამოგვდიოდა. დემოკრატიული პარტიების კოორდინაციას იხილავთ. ვერც „ნაციონალური მოძრაობა“ და ვერც „ლელო“ ვერ გაეკარება. საბოლოო ჯამში საკუთარმა ამომრჩეველმა უნდა გამოუტანოს განაჩენი, მაგრამ ჩვენ ოლიგარქიულ ძალებს, არც ბიძინა ივანიშვილისას, არც ხაზარაძისას და არც სააკაშვილის ავტოკრატიას, ჩვენი მხრიდან ლეგიტიმაციას არ გავუკეთებთ.

მე დემოკრატიულ პარტიებად მივიჩნევ შემდეგ პარტიებს: „თავისუფლების მოედანი“; „დროა“, „გირჩი“; „ახალი“, ეს არის პარტიები, რომელიც ამ თვეების განმავლობაში გამოვცადე, არაერთი აქცია ჩავატარეთ, კამპანიები ჩავატარეთ. გამოგვდიოდა ნორმალური თანამშრომლობა.

„ევროპული საქართველო“ „ნაციონალური მოძრაობის“ ალიანსის ნაწილი იყო, არც ვიცი რა გადაწყვეტილებას მიიღებენ, სად არიან. „სტრატეგია აღმაშენებელი“ და „ევროპული საქართველო“ იყო „ნაციონალური მოძრაობის“ კოალიციის ნაწილი, იმ კოალიციიდანაც არ გამოსულან ჯერ და შესაბამისად, მათზე ვერ ვილაპარაკებ. „სტრატეგიაც“ და „ევროპული საქართველოც“ არიან „ნაციონალური მოძრაობა“, - განაცხადა თამარ ჩერგოლეიშვილმა.

რაც შეეხება მეხუთე პრეზიდენტს, სალომე ზურაბიშვილს, თამარ ჩერგოლეიშვილის თქმით, ზურაბიშვილი იქნება ის პიროვნება, „რომელიც ჩაიბარებს თავისუფალ არჩევნებს“.

„სალომე ზურაბიშვილი კვლავინდებურად მოიაზრება იმად, რომ როდესაც დემოკრატიული პროცესი დუღილის წერტილს მიაღწევს და თავისუფალ არჩევნებს მივიღებთ, სალომე ზურაბიშვილი იქნება ის ფიგურა, რომელიც ჩაიბარებს თავისუფალ არჩევნებს. ის არის ყველაზე უკეთ პოზიციონირებული, ჩაიბაროს თავისუფალი არჩევნები და საერთაშორისო საზოგადოებასთან იყოს დემოკრატიული პროტესტის ხმა“, - განაცხადა თამარ ჩერგოლეიშვილმა.