პაკისტანისა და ავღანეთის ძალებს შორის ჩრდილო-დასავლეთის სასაზღვრო რეგიონში შეტაკებები განახლდა, - ინფორმაციას Associated Press-ი ავრცელებს.

გამოცემის ცნობით, პაკისტანის სახელმწიფო მედია იუწყება, რომ ავღანეთის ჯარებმა „არაპროვოცირებული ცეცხლი“ გახსნეს, რომელიც პაკისტანელებმა მოიგერიეს.

ავღანეთის ხოსტის პროვინციის პოლიციის პრესსპიკერის მოადგილემ, ტაჰირ აჰრარმა შეტაკებების შესახებ ინფორმაცია დაადასტურა, მაგრამ დამატებით დეტალებზე არ ისაუბრა.

ცნობისთვის, პაკისტანელ და ავღანურ ძალებს შორის შეტაკებები შაბათსაც მოხდა, რომელიც კვირას, საუდის არაბეთისა და კატარის მოწოდების შემდეგ, შეწყდა, თუმცა პაკისტანსა და ავღანეთს შორის ყველა სასაზღვრო გამშვები პუნქტი დაიხურა. „თალიბანის“ მთავრობამ განაცხადა, რომ ავღანეთის ტერიტორიისა და საჰაერო სივრცის დარღვევების საპასუხოდ, პაკისტანის რამდენიმე სამხედრო პუნქტი დაბომბეს, რის შედეგადაც 58 პაკისტანელი ჯარისკაცი დაიღუპა. პაკისტანის სამხედრო ძალების ცნობით კი, საზღვრის გასწვრივ საპასუხო ცეცხლის დროს „23 ჯარისკაცი დაკარგეს და 200-ზე მეტი ტერორისტი გაანეიტრალეს“.