ამერიკის შეერთებულ შტატებში ვიზიტით მყოფი უკრაინელი ოფიციალური პირების დელეგაცია Tomahawk-ის ტიპის ფრთოსანი რაკეტების მწარმოებელი კომპანია Raytheon-ის წარმომადგენლებს შეხვდა, - ინფორმაციას უკრაინული მედია პრეზიდენტის ადმინისტრაციის ხელმძღვანელზე, ანდრეი ერმაკზე დაყრდნობით ავრცელებს.

მათივე ინფორმაციით, ერმაკის გარდა შეხვედრას ესწრებოდნენ უკრაინის პრემიერ-მინისტრი იულია სვირიდენკო, ეროვნული უშიშროებისა და თავდაცვის საბჭოს მდივანი რუსტემ უმეროვი, საგარეო საქმეთა მინისტრის პირველი მოადგილე სერგეი კისლიცია და უკრაინის ელჩი აშშ-ში ოლგა სტეფანიშინა.

უკრაინის დელეგაცია ასევე შეხვდა კიდევ ერთი ამერიკული თავდაცვის კომპანიის, Lockheed Martin-ის წარმომადგენლებს.

„მათი ტექნოლოგიები სიცოცხლის მხსნელია: F-16-ები და თანამედროვე საჰაერო თავდაცვის სისტემები იცავს უკრაინის ცას, ხოლო მათი შეტევითი გადაწყვეტილებები საიმედოდ უჭერს მხარს ჩვენს ძალებს ფრონტის ხაზზე“, - წერს ერმაკი.

მისი თქმით, ამერიკულ კომპანიებთან უკრაინის თანამშრომლობა ძლიერდება.