არჩილ გორდულაძე - დაწესებულ ჯარიმებს პრევენციული შედეგები ვერ მოაქვს - 300 დღის განმავლობაში რამდენიმე ათეული ადამიანი თბილისის მილიონზე მეტ მოქალაქეზე ძალადობს, ხელს უშლის ტრანსპორტის, სასწრაფოსა და სახანძრო მანქანების გადაადგილებას
დაწესებულ ჯარიმებს პრევენციული შედეგები ვერ მოაქვს - შესაბამისად, 300 დღის განმავლობაში რამდენიმე ათეული ადამიანი თბილისის მილიონზე მეტ მოქალაქეზე ძალადობს და ხელს უშლის ტრანსპორტის, სასწრაფო დახმარებისა და სახანძრო მანქანების გადაადგილებას, - ასე ხსნის პარლამენტის იურიდიულ საკითხთა კომიტეტის თავმჯდომარე არჩილ გორდულაძე შეკრება-მანიფესტაციებთან დაკავშირებით კანონის გამკაცრების მორიგ ინიციატივას.
გორდულაძის თქმით, ნებისმიერი ადამიანის უფლებაა, რომ თავისუფლად გადაადგილდეს.
„როდესაც კონკრეტული პირები თავიანთი კონსტიტუციური უფლების ანუ გამოხატვის თავისუფლებით სარგებლობენ, მათ კარგად უნდა გაითვალისწინონ, რომ ამ ქვეყანაში სხვა ადამიანებიც არსებობენ და ისინი არ უნდა შეზღუდონ.
ჩვენ მიერ წარმოდგენილი საკანონმდებლო ცვლილების მიზანია, ყველას ჰქონდეს შესაძლებლობა კონსტიტუციით გათვალისწინებული საკუთარი უფლებით ისარგებლოს - გამოხატოს თავისი აზრი, როგორც უნდა და სადაც უნდა, მაგრამ ისე, რომ გათვალისწინებული იყო სხვა ადამიანის უფლებებიც“, - განაცხადა გორდულაძემ.
პარლამენტმა შეკრება-მანიფესტაციის ჩატარების წესის დარღვევისთვის პასუხისმგებლობის გამკაცრების საკითხს პირველი მოსმენით მხარი დაუჭირა.
საკითხის განხილვა დაჩქარებული წესით მიმდინარეობს.
