რუსეთი ვერ ხედავს მნიშვნელოვან დაბრკოლებებს რუსეთისა და აშშ-ის პრეზიდენტების, ვლადიმერ პუტინისა და დონალდ ტრამპის შეხვედრისთვის, თუმცა პროცესი მარტივი არ არის, - ამის შესახებ რუსეთის საგარეო საქმეთა მინისტრის მოადგილემ, სერგეი რიაბკოვმა განაცხადა.

„ვერ ვხედავ რაიმე მნიშვნელოვან დაბრკოლებებს. საკითხი იმაში მდგომარეობს, რომ ანკორიჯში პრეზიდენტების მიერ განსაზღვრული პარამეტრები, ეს ჩარჩოები, კონკრეტული დეტალებით იყოს დაზუსტებული. ეს რთული პროცესია, უნდა ვაღიაროთ. მაგრამ დიპლომატები სწორედ ამისთვის არიან, რომ ამ საკითხებზე იმუშაონ“, - განუცხადა რიაბკოვმა ჟურნალისტებს.

მისი თქმით, რუსეთი აგრძელებს მზადებას რუსეთისა და აშშ-ის პრეზიდენტების, ვლადიმერ პუტინისა და დონალდ ტრამპის შესაძლო სამიტისთვის, თუმცა მიაჩნია, რომ ყურადღება, უპირველეს ყოვლისა, მის შინაარსზე უნდა იყოს გამახვილებული.

„ვამბობთ, რომ სამიტისთვის მზადება მიმდინარეობს. მას შეიძლება სხვადასხვა ფორმა ჰქონდეს. მიგვაჩნია, რომ ყურადღება უნდა გავამახვილოთ შინაარსობრივ მხარეზე და ვიმუშაოთ ამაზე. საკითხები გრაფიკებთან, ფორმატებთან და ნაბიჯების თანმიმდევრობასთან დაკავშირებით, ძირითადად, შინაარსობრივი მხარიდან გამომდინარეობს. ამიტომ, ჩვენ ვაგრძელებთ მზადებას“, - განმარტა რიაბკოვმა.