ვიქტორ ორბანის განცხადებით, დონალდ ტრამპმა რუსული ნავთობკომპანიების წინააღმდეგ სანქციების დაწესებით შეცდომა დაუშვა.

უნგრეთის პრემიერ-მინისტრმა, ვიქტორ ორბანმა La Reppubblica-სთან ინტერვიუში კითხვაზე, რუსული ნავთობკომპანიების, „როსნეფტისა“ და „ლუკოილის“ წინააღმდეგ სანქციების დაწესებით, აშშ-ის პრეზიდენტი დონალდ ტრამპი „შორს ხომ არ წავიდა და შეცდომა ხომ არ დაუშვა“, - უპასუხა, რომ „დიახ“.

„უნგრეთის გადმოსახედიდან, დიახ. ამიტომ, შევეცდებით, რომ გამოსავალი ვიპოვოთ, განსაკუთრებით უნგრეთისთვის“, - აღნიშნა ორბანმა.

მისი თქმით, სანქციების საკითხს ვაშინგტონში, დონალდ ტრამპთან შეხვედრაზე განიხილავს.

„ჩვენ განვიხილავთ, თუ როგორ შევქმნათ მდგრადი სისტემა ჩემი ქვეყნის ეკონომიკისთვის, რადგან უნგრეთი რუსულ ნავთობსა და გაზზე მნიშვნელოვნად არის დამოკიდებული. მათ გარეშე, ფასები მნიშვნელოვნად გაიზრდება, რაც ჩვენი მარაგების დეფიციტს გამოიწვევს“, - განაცხადა უნგრეთის პრემიერ-მინისტრმა.