სხდომის მდივანმა იკითხა, ბრალდებული რომელიაო, რომ დამინახა, ორი წუთი გაჩერებული მიყურებდა, ბრალდებული ეს არისო?, - ამის შესახებ თბილისის მერის, კახა კალაძის საარჩევნო ბანერის დაზიანებაში ბრალდებულმა 23 წლის მეგი დიასამიძემ სხდომის დასრულების შემდეგ "ინტერპრესნიუსს" განუცხადა.

დღევანდელ პროცესზე მტკიცებულებების დასაშვებობაზე იმსჯელეს, ამასთან, საქმე არსებითად განსახილველად გადაეცა სასამართლოს.

"ორი ცრუ მოწმე პოლიციელის ჩვენებაა, რომლებიც ამბობენ, რომ თურმე, სადღაც მნახეს იმ დღეს, ნიღბის გარეშე, მელიქიშვილის მიმდებარედ, აქციაზე, რაც ტყუილია და არ ყოფილა. მოსამართლე ლელა კალიჩენკომ პროკურატურას რაც უნდოდა, ის დააკმაყოფილა, ამიტომ შემდეგი სხდომა 11 ნოემბერს ჩანიშნეს. აქ არანაირ დანაშაულთან ბრძოლა არაა, დევნა და დაშინებაა, სხდომის მდივანმა იკითხა, ბრალდებული რომელიაო, რომ დამინახა, ორი წუთი გაჩერებული მიყურებდა, ბრალდებული ეს არისო? გაკვირვებული თვითონ რჩებიან. არ მგონია, სამართალთან გვქონდეს საქმე, როგორც "სინდიდის პატიმრებთან" დაკავშირებით იყო ტყუილი ტყუილზე იყო აკინძული, ალბათ, აქაც ასე გაგრძელდება შემდეგი პროცესები",- განაცხადა დიასამიძემ.

ცნობისთვის, აქტივისტ მეგი დიასამიძეს კახა კალაძის საარჩევნო ბანერის დაზიანებას ედავებიან. მას თბილისის საქალაქო სასამართლომ აღკვეთის ღონისძიების სახით 2 000 ლარიანი, არასაპატიმრო გირაო შეუფარდა.