ვერ ვიტყვი, რომ ეს პროკურატურის საოცარი გადაწყვეტილებაა, რადგან 4 თვის განმავლობაში ნინოს ჯანმრთელობის მდგომარეობა კრიტიკულად დამძიმდა, რაზეც პასუხისმგებლობა პროკურატურას აქვს,- ამის შესახებ პედაგოგ, ნინო დათაშვილის ადვოკატმა, თამარ გაბოძემ განაცხადა.

მისი თქმით, პროკურატურას სხვა გზა დარჩენილი აღარ ჰქონდა.

„ჩვენ გვქონდა შუამდგომლობა სასამართლოსთვის მომზადებული, სადაც ნინო დათაშვილის დაუყოვნებლივ გათავისუფლებას ვითხოვდით, ამის შესახებ კი სასამართლოს გუშინ შევატყობინეთ. დღეს კი პროკურატურამ თავად დააყენა შუამდგომლობა პატიმრობის-გირაოთი შეცვლასთან დაკავშირებით.

მე ვერ ვიტყვი, რომ ეს პროკურატურის საოცარი გადაწყვეტილებაა, რადგან 4 თვის განმავლობაში ნინოს ჯანმრთელობის მდგომარეობა კრიტიკულად დამძიმდა, რაზეც პასუხისმგებლობა პროკურატურას აქვს, რადგან ის იყო უკანონო, დაუსაბუთებელ პატიმრობაში. ასევე, მისი ჯანმრთელობის მდგომარეობა უბრალოდ არ აძლევდა ადამიანს იმის შესაძლებლობას, რომ პატიმრობაში ყოფილიყო და პატიმრობის პირობებში მისი ჯანმრთელობის მდგომარეობა გაუარესდებოდა. ამის შესახებ პროკურატურისთვის 2025 წლის, 20 ივნისს ცნობილი იყო. დღეს მათ მიერ დაყენებული შუამდგომლობა დიდი ვერაფერი ვერ არის, რადგან სხვა გზა არ არსებობდა. დღესვე დატოვებს საპატიმროს“,- განაცხადა თამარ გაბოძემ.

ინფორმაციისთვის, დღევანდელ სასამართლო სხდომაზე, ბრალდებულ ნინო დათაშვილისთვის აღკვეთის ღონისძიების სახით შეფარდებული პატიმრობა, სასამართლომ უფრო მსუბუქი აღკვეთის ღონისძიების სახით შეცვალა და 5000-ლარიანი გირაო შეუფარდა.

ცნობისთვის, ნინო დათაშვილი თბილისის საქალაქო სასამართლოში 9 ივნისს მომხდარი ფაქტის გამო 20 ივნისს დააკავეს. მას ბრალდება საქართველოს სისხლის სამართლის კოდექსის 353-ე სეკუნდა მუხლის მე-3 ნაწილით წარედგინა, რაც საჯარო მოსამსახურეზე თავდასხმას მის მიერ სამსახურებრივი მოვალეობის შესრულების დროს გულისხმობს.აღნიშნული სასჯელის სახედ და ზომად ჯარიმას, ან 4-დან 7 წლამდე თავისუფლების აღკვეთას ითვალისწინებს.