არაფერი გიჟი მე არ ვარ, ნარკოტიკებს მოვიხმარ 30 წელია, - ამის შესახებ ერთ-ერთ სუპერმარკეტთან მომხდარი ჯგუფური ძალადობის ორგანიზების ფაქტზე ბრალდებულმა მანანა გიორგობიანმა სასამართლო პროცესზე განაცხადა.

აღნიშნული მან მას შემდეგ თქვა, რაც მისმა ადვოკატმა, ლევან მარსაგიშვილმა განაცხადა, რომ გიორგობიანის მიმართ ფსიქიატრიული ექსპერტიზაა დანიშნული.

„არაფერი გიჟი მე არ ვარ, ნუ იტყუებით. არანაირი აშლილობა არ მაქვს, შვილის სიკვდილის შემდეგ, წმინდანების ხილვა დავიწყე.. მითხრეს ღვთის მადლია შენზეო, ბიპოლარული აშლილობა არ მაქვს, ნარკოტიკებს მოვიხმარ 30 წელია“, - განაცხადა გიორგობიანმა.

მას მოსამართლემ ჰკითხა, თუ რატომ მოიხმარს ნარკოტიკს.

„მომწონს და იმიტომ“ - უპასუხა მას გიორგობიანმა და განაგრძო:

„ამფეტამინი გადავაგდე ახლახან. ფსიქოტროპული მოქმედებს ჩემზე ცუდად, შვილის პანაშვიდზე გამიკეთეს და ფსიქიატრიულში მომათავსეს. ჩემზე ნარკოტიკი ვერ მოქმედებს. გიჟი არ ვარ და ნურავინ გამოიყენებს ამას“, - განაცხადა გიორგობიანმა.

ცნობისთვის, ერთ-ერთ სუპერმარკეტთან მომხდარი ჯგუფური ძალადობის ორგანიზების ფაქტზე ბრალდებულ მანანა გიორგობიანს აღკვეთის ღონისძიების სახით პატიმრობა შეეფარდა.

დღესვე, გაიმართება ამავე საქმეზე დაკავებული კიდევ 5 პირის მათ შორის, მომღერალ მამუკა ჩარკვიანის შვილის, ჯაკო ჩარკვიანის სასამართლო პროცესიც.

მანანა გიორგობიანს ბრალდება საქართველოს სისხლის სამართლის კოდექსის 225-ე მუხლის პირველი ნაწილით წარედგინა, რაც ჯგუფური მოქმედების ორგანიზებასა და ხელმძღვანელობას გულისხმობს, რასაც თან ახლდა ძალადობა. აღნიშნული ბრალდება სასჯელის სახედ და ზომად 9 წლამდე თავისუფლების აღკვეთას ითვალისწინებს.რაც შეეხება დაკავებულ 5 პირს, მათ შორის, ჯაკო ჩარკვიანს, ჯგუფურ ძალადობაში მონაწილეობას ედავებიან.