რუსეთის მიერ უკრაინის ქალაქ დნიპროზე განხორციელებული თავდასხმის შედეგად ერთი ადამიანი დაიღუპა და 10 დაშავდა, - ინფორმაციას უკრაინული მედია საგანგებო სიტუაციების სამსახურზე დაყრდნობით ავრცელებს.

მათივე ინფორმაციით, დაშავებულებს შორის ორი ბავშვია.

საგანგებო სიტუაციების სამსახურში აცხადებენ, რომ რუსულმა დრონმა ღამით ცხრასართულიან საცხოვრებელ შენობას დაარტყა, რის შედეგადაც მეოთხედან მეექვსე სართულამდე მდებარე ბინები განადგურდა.

„სამაშველო ოპერაციების დროს საგანგებო სიტუაციების თანამშრომლებმა 28 ადამიანი გადაარჩინეს, მათ შორის ხუთი ბავშვი. მეხუთე სართულზე მდებარე ბინაში ქალის ცხედარი იპოვეს“, - აცხადებენ სამაშველო სამსახურში.

ამასთან, რუსებმა დრონებით შეუტიეს ოდესის ოლქსაც. დარტყმების შედეგად ენერგეტიკული ინფრასტრუქტურის ობიექტში ხანძარი გაჩნდა.

ხარკოვის ოლქის პესოჩინის თემში რუსების მიერ მართვადი ბომბით განხორციელებული თავდასხმის შედეგაც რვა ადამიანი დაშავდა.

ამასთან, ზაპოროჟიეს საოლქო-სამხედრო ადმინისტრაციის ცნობით, ზაპოროჟიეს, ვასილიევსკის და პოლოგოვსკის რაიონებზე რუსების მიერ განხორციელებული თავდასხმების შედეგად სამი ადამიანი დაიღუპა და ექვსი დაიჭრა.