ტოკიოს მიერ რუსეთის წინააღმდეგ დაწესებული სანქციების გამო, რუსეთი 30 იაპონიის მოქალაქეს, მათ შორის იაპონიის საგარეო საქმეთა სამინისტროს პრესსპიკერს ტოშიჰირო კიტამურას, ქვეყანაში შესვლას უკრძალავს.

ინფორმაციას რუსული მედია ქვეყნის საგარეო საქმეთა სამინისტროზე დაყრდნობით ავრცელებს.

„ოფიციალური ტოკიოს მიერ ჩვენი ქვეყნის წინააღმდეგ სპეციალურ სამხედრო ოპერაციასთან დაკავშირებით დაწესებული ე.წ. სანქციების საპასუხო ზომების ფარგლებში მიღებულია გადაწყვეტილება [იაპონიის 30 მოქალაქისთვის] რუსეთის ფედერაციაში შესვლის სამუდამოდ აკრძალვის შესახებ“, - ნათქვამია განცხადებაში.

უწყევის ცნობით, სიაში შედიან ჟურნალისტები და იაპონიის უნივერსიტეტების პროფესორები, ასევე იაპონიის საგარეო საქმეთა სამინისტროს პრესსპიკერი კიტამურა.

შეგახსენებთ, 2022 წლის თებერვალში რუსეთის უკრაინაში შეჭრის შემდეგ, იაპონიის მთავრობამ რუსეთის წინააღმდეგ სანქციების რამდენიმე პაკეტი დააწესა.