უკრაინის ქალაქ ლვოვში 10 და 11 დეკემბერს ევროკავშირის ქვეყნების ევროპის საქმეთა მინისტრების არაფორმალური სამიტი გაიმართება.

POLITICO წერს, რომ სამიტის მიზანია უკრაინის ევროკავშირში გაწევრიანების განაცხადის მხარდაჭერა იმ ფონზე, როცა მოკავშირეები უნგრეთის მხრიდან წინააღმდეგობის გამო გამოწვეული შეფერხებების გვერდის ავლას ცდილობენ.

„ჩვენი განხილვების მთავარი აქცენტი უკრაინის ევროკავშირში გაწევრიანების გზაზე მიღწეულ პროგრესზე იქნება. შეხვედრა შესაძლებლობას მოგვცემს შევაფასოთ მიღწეული შედეგები, გავუზიაროთ მოსაზრებები შემდეგ ნაბიჯებთან დაკავშირებით და კიდევ ერთხელ დავადასტუროთ პოლიტიკური მხარდაჭერა უკრაინის რეფორმებისა და ინტეგრაციის მცდელობების მიმართ“, - აღნიშნულია მოსაწვევ წერილში, რომელიც ევროკავშირის საბჭოს თავმჯდომარე ქვეყანამ, დანიამ და უკრაინის ვიცე-პრემიერ მინისტრმა, ტარას კაჩკამ მინისტრებს ერთობლივად გაუგზავნეს.

წერილში ხაზგასმულია, რომ შეხვედრა იქნება მკაფიო პოლიტიკური გზავნილი იმასთან დაკავშირებით, რომ უკრაინის მომავალი ევროკავშირშია.

„უკრაინაში შეკრებით, ჩვენ გავაგზავნით მკაფიო და ერთიან პოლიტიკურ გზავნილს, რომ უკრაინის მომავალი ევროკავშირშია“, - აღნიშნულია დოკუმენტში.

ორმა ოფიციალურმა პირმა ჟურნალისტებს განუცხადა, რომ ევროკავშირის წევრ სახელმწიფოებს სურთ უზრუნველყონ, რომ უკრაინამ და მოლდოვამ რეფორმების შემდეგი რაუნდი ოფიციალური დამტკიცების მოლოდინის გარეშე დაიწყონ. POLITICO-ს განმარტებით, ეს უკრაინას საშუალებას მისცემს სწრაფად იმოქმედოს, თუ უნგრეთის პროტესტთან დაკავშირებული ჩიხი მოგვარდება.

„იდეა იმაში მდგომარეობს, რომ მაქსიმალურად ბევრი რამ გავაკეთოთ ცვლილებების მოლოდინის გარეშე. თუ უნგრეთს ვეტოს უფლება აღარ ექნება, ჩვენ შევძლებთ დაუყოვნებლივ ვიმოქმედოთ“, - განუცხადა ერთ-ერთმა ოფიციალურმა პირმა ჟურნალისტებს.