ყველა ფაქტი მიუთითებს, რომ პოლონეთში რკინიგზაზე მომხდარი დივერსიის უკან რუსული კვალია, - ამის შესახებ უკრაინის პრეზიდენტი, ვოლოდიმირ ზელენსკი X-ზე წერს.

უკრაინის პრეზიდენტის, ვოლოდიმირ ზელენსკის ცნობით, პოლონეთის პრემიერ-მინისტრს, დონალდ ტუსკს ესაუბრა.

„პრემიერ-მინისტრმა პოლონეთის რკინიგზაზე მომხდარი დივერსიული აქტების შესახებ სამართალდამცავი ორგანოებისა და დაზვერვის სამსახურებისგან მიღებული დეტალები გამიზიარა. დივერსიის მოსაწყობად და უკრაინის წინააღმდეგ დეზინფორმაციული კამპანიის დასაწყებად სოციალური პლატფორმა „ტელეგრამი“ იქნა გამოყენებული“, - წერს ვოლოდიმირ ზელენსკი.

მისი თქმით, უკრაინა პოლონეთთან თანამშრომლობისთვის და ინფორმაციის გაზიარებისთვის მზად არის.

„ჩვენი ინფორმაციაც იგივეა: ყველა ფაქტი მიუთითებს, რომ ამის უკან რუსული კვალია. ამით რუსების გარდა არავინ არის დაინტერესებული. შევთანხმდით, რომ უკრაინულ-პოლონურ ჯგუფს შევქმნით, რომელიც მომავალში რუსული მხარის მიერ მსგავსი სიტუაციების შექმნის თავიდან აცილების მიზნით იმუშავებს“, - აცხადებს უკრაინის პრეზიდენტი.