თუ საქართველოს ხელისუფლება ჩორჩანაში საგუშაგოს გახსნის შეცდომას აღიარებს, ლოგიკური იქნება მისი მოხსნა, - ამის შესახებ ინციდენტების პრევენციისა და მათზე რეაგირების მექანიზმის ფორმატში ე.წ. სამხრეთ ოსეთის „დელეგაციის“ ხელმძღვანელმა იგორ კოჩიევმა ჟურნალისტებთან საუბარში განაცხადა.

მისი თქმით, ინციდენტების პრევენციისა და მათზე რეაგირების მექანიზმის 128-ე შეხვედრის საკვანძო პუნქტი კვლავ სოფელ უისტას [იგივე წნელისი, ჩორჩანას მახლობლად] მახლობლად ქართული საგუშაგოს გაუქმება გახდა.

„ამჯერად, მაგალითად მოვიყვანეთ, რომ საგუშაგოს გახსნის ინიციატორი საქართველოს ყოფილი შინაგან საქმეთა მინისტრი, გიორგი გახარია იყო, რომელიც მოგვიანებით პრემიერ-მინისტრი გახდა. ახლა გახარია, რომელიც სავარაუდოდ გერმანიაში იმყოფება, დაუსწრებლად დაპატიმრებულია საქართველოს პროკურატურის მიერ. მის წინააღმდეგ წაყენებულ ბრალდებებს შორის ფიგურირებს ვითარების დესტაბილიზაციის მცდელობა სოფელ უისტასთან [იგივე წნელისი, ჩორჩანას მახლობლად], სადაც ქართული პოლიციის საგუშაგოა გახსნილი“, - განაცხადა კოჩიევმა.

მისი თქმით, თუ საქართველოს ხელისუფლება ჩორჩანაში საგუშაგოს გახსნის შეცდომას აღიარებს, ლოგიკური იქნება მისი მოხსნა.