დენის შმიგალი კიევში აშშ-ის არმიის მდივანს შეხვდა
დენის შმიგალი კიევში აშშ-ის არმიის მდივანს შეხვდა, - ინფორმაციას უკრაინული მედია ავრცელებს.
უკრაინის თავდაცვის მინისტრის, დენის შმიგალის ცნობით აშშ-ის არმიის მდივანთან, დენ დრისკოლთან შეხვედრაზე თავდაცვის სფეროში ინოვაციებისა და შეთანხმებების განხორციელების საკითხები განიხილა.
„უკრაინა ამერიკის შეერთებული შტატების საიმედო მოკავშირეა. ჩვენ მზად ვართ თანამედროვე ომის შედეგად მიღებული გამოცდილების საფუძველზე აშშ-ის გლობალური ლიდერობა გავაძლიეროთ“, - წერს შმიგალი „ტელეგრამის“ არხზე.
დენის შმიგალმა დენ დრისკოლს უკრაინის მიერ თავდაცვის სფეროში წარმოებული ტექნოლოგიური ინოვაციები, მათ შორის, დრონები წარუდგინა.
„უკრაინა მზადაა მოკავშირეებთან ერთად უსაფრთხოების სფეროში ერთობლივი გადაწყვეტილებები შეიმუშაოს. აღნიშნულთან დაკავშირებით აშშ-ის როლი უმნიშვნელოვანესია“, - აცხადებს უკრაინის თავდაცვის მინისტრი.
