რუსთაველის გამზირზე მიმდინარე აქციაზე კიდევ ერთი მომიტინგე დააკავეს. არსებული ინფორმაციით, დაკავებულია ლიდა ცომაია. რა გახდა აქციის მონაწილის დაკავების მიზეზი, ჯერჯერობით უცნობია.

მანამდე პარლამენტის წინ პოლიციის მოთხოვნის დაუმორჩილებლობისთვის აქციის ერთ-ერთი მონაწილე, სოფო მარკოზია დააკავეს.

აქციის მონაწილეებმა პერფორმანსიც გამართეს. მათ ადგილზე ცოცხალი ჯაჭვი შეკრეს. ასევე, მომიტინგეებმა ხმოვანი სათამაშოები მიიტანეს. აქციის მონაწილეებმა აღნიშნულით დაკავებულ დემონსტრანტს, ვანო სხირტლაძეს გამოუცხადეს სოლიდარობა, რომელსაც დღეს 8-დღიანი ადმინისტრაციული პატიმრობა შეუფარდეს. ის ორი დღის წინ, რუსთაველზე სწორედ მსგავსი სათამაშოთი გადაადგილდებოდა, რის შემდეგაც ის დააკავეს.

"რეჟიმს ეშინია სათამაშოების", "რეჟიმს ეშინია პროტესტის", "პოლიციელებს ეშინიათ ჭყვიტინა სათამაშოების", - აცხადებენ აქციის მონაწილეები.