ჩინეთის პრეზიდენტ სი ძინპინთან ძალიან კარგი სატელეფონო საუბარი მქონდა, - ამის შესახებ აშშ-ის პრეზიდენტი, დონალდ ტრამპი სოციალურ ქსელში წერს.

„ბევრი საკითხი განვიხილეთ, მათ შორის უკრაინა-რუსეთი, ფენტანილი, სოფლის მეურნეობის პროდუქტები და ა.შ. ჩვენი ფერმერებისთვის ძალიან მნიშვნელოვან შეთანხმებას მივაღწიეთ და ის კიდევ უფრო გაუმჯობესდება. ჩინეთთან ჩვენი ურთიერთობა ძალიან ძლიერია“, - წერს დონალდ ტრამპი Truth Social-ზე.

ტრამპის თქმით, სამხრეთ კორეაში შეხვედრის შემდეგ მხარეებს შორის მიღწეულ შეთანხმებებთან დაკავშირებით მნიშვნელოვანი პროგრესი არსებობს.

„პრეზიდენტმა სი ძინპინმა აპრილში პეკინში მიმიწვია, რასაც დავთანხმდი და პასუხად წლის ბოლოს სახელმწიფო ვიზიტით აშშ-ში მოვიწვიე. შევთანხმდით, რომ მნიშვნელოვანია ხშირი კომუნიკაცია გვქონდეს, რასაც მოუთმენლად ველი!“ - აცხადებს აშშ-ის პრეზიდენტი.