აშშ არაბთა გაერთიანებულ საამიროებში უკრაინასთან და რუსეთთან საიდუმლო სამშვიდობო მოლაპარაკებებს აწარმოებს, - ინფორმაციას Financial Times-ი ამერიკელ ოფიციალურ პირზე დაყრდნობით ავრცელებს.

გამოცემის ინფორმაციით, აშშ-ის არმიის მდივანი დენ დრისკოლი აბუ-დაბიში ორშაბათს ჩავიდა, სადაც მოლაპარაკებებს უკრაინის დაზვერვის მთავარი სამმართველოს ხელმძღვანელთან, კირილ ბუდანოვთან და რუსეთის დელეგაციის წარმომადგენლებთან მართავს.

„დრისკოლი ამ სამშვიდობო პროცესში ბოლო დღეების განმავლობაში აქტიურად არის ჩართული. ამიტომ, მას შეუძლია ინფორმაცია რუსებს გადასცეს. როგორც სახელმწიფო მდივანმა რუბიომ თქვა, ჩვენ 24/7-ზე ვმუშაობთ, რათა სწრაფი პროგრესი გვქონდეს“, - განუცხადა გამოცემას ამერიკელმა მაღალჩინოსანმა.

უცნობია, დრისკოლი აბუ-დაბიში მხარეებთან მოლაპარაკებებს ერთობლივად აწარმოებს, თუ მათ ცალ-ცალკე ხვდება.