ნატოს გენერალური მდივანი გაუგებარ მინიშნებებს აკეთებს - ასეთი ელფერის მქონე განცხადებას ჯობია, თუ არის რაიმე სათქმელი, ბოლომდე გაგვაგებინოს, - ამის შესახებ პარლამენტის საპროცედურო საკითხთა და წესების კომიტეტის თავმჯდომარემ, დავით მათიკაშვილმა ნატო-ს გენერალური მდივნის, მარკ რუტეს განცხადების შეფასებისას აღნიშნა.

მისი თქმით, საქართველო მზადაა კონსტიტუციური ვალდებულებები შეასრულოს, "ოღონდ ეს ყველაფერი არის ორმხრივი თამაში და წარმოუდგენელია ცალ კარში თამაში ნებისმიერ სტრუქტურასთან, მათ შორის, ნატოსთან".

როგორც მათიკაშვილი აღნიშნავს, მომავალი იმაზეა დამოკიდებული, რა განწყობა იქნება და როგორ განვითარდება მოვლენები ამ მოცემულობაში.

„ნატოს გენერალური მდივანი გაუგებარ მინიშნებებს აკეთებს. პირველი - თუ რა წყაროებისგან იღებენ საქართველოს შესახებ ინფორმაციას ევროპული და ევროატლანტიკური სტრუქტურები, ჩვენთვის კარგად არის ცნობილი. აქაური რადიკალებისგან, აქაური "ენჯეოშნიკებისგან", ხალხისგან თუ მედიასაშუალებებისგან, საიდანაც ელემენტარულად, სიმართლეს ვერ გაიგებ. მეორე - ამ რაღაც ტენდენციურ განცხადებას, ასეთი ელფერის მქონე განცხადებას ჯობია, თუ არის რაიმე სათქმელი, ბოლომდე გაგვაგებინოს. ძალიან კარგია, რომ გვაკვირდებით. ჩვენც მზად ვართ, კონსტიტუციური ვალდებულებები, რაც გაგვაჩნია, შევასრულოთ. ოღონდ ეს ყველაფერი არის ორმხრივი თამაში და გამორიცხულია, წარმოუდგენელია ცალ კარში თამაში ნებისმიერ სტრუქტურასთან, მათ შორის, რა თქმა უნდა, ნატოსთან. ჩვენ ვაგრძელებთ ნატოსთან ურთიერთობას. თქვენ კარგად იცით, რომ გრძელდება გარკვეული წვრთნები, ერთობლივი მოქმედებები. ბუნებრივია, მომავალი იმაზეა დამოკიდებული, რა განწყობა იქნება და როგორ განვითარდება მოვლენები ზოგადად, ამ მოცემულობაში“, - განაცხადა მათიკაშვილმა.

ცნობისთვის, მარკ რუტემ განაცხადა, რომ საქართველოში მიმდინარე პროცესებთან დაკავშირებით მიამიტი არაა.

კითხვაზე, საქართველო კვლავ ასპირანტი ქვეყანაა თუ არა, მარკ რუტემ უპასუხა, რომ „ევროატლანტიკურ სივრცეში ნებისმიერ ქვეყანას, რომელსაც ნატო-ს წევრობა სურს, შეუძლია სურვილი გამოხატოს და შემდეგ პროცესი იწყება“.

„რა თქმა უნდა, მიამიტი არ ვარ იმასთან დაკავშირებით, რაც საქართველოში ხდება. ჩვენ ძალიან შეშფოთებულები ვართ. ჩვენ ამის შესახებ ქართველებს ნათლად ვაცნობეთ“, - განაცხადა მარკ რუტემ.