ეს დეგრადაციის ახალი დონეა, - ასე ეხმაურება „მაგნიტსკის აქტის“ ავტორი და Hermitage Capital Management-ის აღმასრულებელი დირექტორი, ბილ ბროუდერი BBC-ის საგამოძიებო სტატიას.

„საქართველოს მთავრობა დემონსტრანტების დასაშლელად პირველი მსოფლიო ომის დროინდელ ტოქსიკურ ქიმიურ ნივთიერებას იყენებს. ეფექტი რამდენიმე კვირის განმავლობაში გრძელდება. ეს დეგრადაციის ახალი დონეა. ერთადერთი კითხვა იმაში მდგომარეობს, თავად მოიფიქრეს ეს, თუ რუსმა მმართველებმა შთააგონეს?“, - წერს ბილ ბროუდერი X-ზე.

შეგახსენებთ, BBC-მ გაავრცელა ინფორმაცია, რომ მათ მიერ შეგროვებული მტკიცებულებები მიუთითებს, რომ საქართველოს ხელისუფლებამ გასულ წელს მთავრობის საწინააღმდეგო საპროტესტო აქციების ჩასახშობად პირველი მსოფლიო ომის დროინდელი ქიმიური იარაღი გამოიყენა.

როგორც BBC-ი წერს, „საქართველოს მთავრობის მიერ ევროკავშირში გაწევრიანების პროცესის შეჩერების წინააღმდეგ მებრძოლი დემონსტრანტები სხვადასხვა სიმპტომებს უჩიოდნენ მათ შორის თვალების წვას, ქოშინს, ხველასა და ღებინებას, რომელიც კვირების განმავლობაში გაგრძელდა“.

BBC-ის ცნობითვე, ესაუბრნენ World Service-ის ქიმიური იარაღის ექსპერტებს, საქართველოს სპეცრაზმის წარმომადგენლებსა და ექიმებს და აღმოაჩინეს, რომ „მტკიცებულებები მიუთითებს იმ აგენტის გამოყენებაზე, რომელსაც საფრანგეთის სამხედროებმა „კამიტი“ უწოდეს“.