დღეს GIPA-ში უნივერსიტეტის აუდიო-ვიზუალური ხელოვნების და ციფრული მედიის საბაკალავრო პროგრამების და ჟურნალისტიკისა და მედია მენეჯმენტის სამაგისტრო პროგრამის სტუდენტების მიერ შექმნილი ფილმების ფესტივალი - GIPA DocU იწყება. ინფორმაციას GIPA ავრცელებს.

მათივე ცნობით, 8-დან 12 დეკემბრამდე, ყოველ საღამოს GIPA-ში კინოჩვენება გაიმართება.

„GIPA-ს სტუდენტები მაყურებელს ახალ დოკუმენტურ, მხატვრულ, ექსპერიმენტულ და ესეი ფილმებს წარუდგენენ.

GIPA-ს აუდიო ვიზუალური ხელოვნების პროგრამის სტუდენტებმა სულ ახლახანს მოიპოვეს აღიარება. თბილისის კინოფესტივალზე “ოქროს პრომეთე” გადაეცა GIPA-ს ორ კურსდამთავრებულს: თიკუ კობიაშვილს სადიპლომო ნამუშევრისთვის “შინაგანი გაზაფხულების ყვავილობა” და ქეთევან ვაშაგაშვილს ფილმისთვის “ცხრათვიანი კონტრაქტი”. სწორედ ამ ფილმებით გაიხსნება და დაიხურება GIPA DocU-ს სტუდენტური ფესტივალი.

აღსანიშნავია, რომ GIPA-ში სტუდენტური პროექტების ფარგლებში კინო-დარბაზი მოეწყო და ფესტივალის გახსნაც სწორედ ამ თარიღს უკავშირდება. ეს ინიციატივა მომავალში ხელს შეუწყობს GIPA-ს სტუდენტების პროფესიული უნარ-ჩვევების განვითარებას და თანამოაზრეთა შეკრებისა და საინტერესო დისკუსიის მიმზიდველ სივრცეს შექმნის.

GIPA DocU 2012 წელს დაარსდა. ამ ფესტივალის ფარგლებში შექმნილი ან დაწყებული ფილმები მსოფლიოს საუკეთესო ფესტივალების ისეთ საკონკურსო სექციებში მოხვდა, როგორიცაა "Vision Du Reel", Dok Leipzig, Hot Docs, ობერჰაუზენის ფესტივალი და სხვა. წელს აუდიო-ვიზუალური ხელოვნების ფაკულტეტის ფარგლებში შექმნილი ფილმი, თიკუ კობიაშვილის სადიპლომო ნამუშევარი “შინაგანი გაზაფხულების ყვავილობა” ბერლინალეს სპეციალურ პროგრამაში მოხვდა. GIPA DocU-ს ალუმნის ბევრმა წარმომადგენელმა სწავლა დოკუმენტური კინოს ისეთ საერთაშორისო პროგრამებსა და სკოლებში გააგრძელა, როგორიცაა Doc Nomad, Close Up, ლონდონის კინოსკოლა, UCL, Goldsmith და ბევრი სხვა“,-აღნიშნულია ინფორმაციაში.