იაპონია ჩინეთს სამხედრო თვალსაზრისით ემუქრება, რაც სრულიად მიუღებელია, - ამის შესახებ ჩინეთის საგარეო საქმეთა მინისტრმა, ვან იმ გერმანელ კოლეგას, იოჰან ვადეფულს განუცხადა.

მისი მტკიცებით, იმის გათვალისწინებით, რომ წელს მეორე მსოფლიო ომის დასრულების 80 წლის იუბილეა, იაპონიამ, როგორც დამარცხებულმა ქვეყანამ, უფრო მეტი სიფრთხილით უნდა იმოქმედოს.

„მაგრამ ახლა მისი ამჟამინდელი ლიდერი ცდილობს ჩინეთისთვის პრობლემებისა და სამხედრო საფრთხის შესაქმნელად ტაივანის საკითხის გამოყენებას, იმ ტერიტორიის, რომლის კოლონიზაციაც იაპონიამ ნახევარი საუკუნის განმავლობაში მოახდინა და ჩინელი ხალხის წინააღმდეგ უამრავი დანაშაული ჩაიდინა. ეს სრულიად მიუღებელია“, - განაცხადა ვანმა.

შეგახსენებთ, ჩინეთსა და იაპონიას შორის ურთიერთობები ბოლო ერთი თვის განმავლობაში დაიძაბა მას შემდეგ, რაც იაპონიის პრემიერ-მინისტრმა, სანაე ტაკაიჩიმ განაცხადა, რომ იაპონიამ, შესაძლოა, ტაივანის წინააღმდეგ ჩინეთის ნებისმიერ სამხედრო ქმედებას უპასუხოს, თუ ეს ასევე საფრთხეს შეუქმნის იაპონიის უსაფრთხოებას. იპონიამ ორი დღის წინ განაცხადა, რომ ჩინეთის მოიერიშე თვითმფრინავებმა რადარი იაპონიის სამხედრო თვითმფრინავებისკენ მიმართეს. იაპონიამ ეს ნაბიჯი საშიშ ქმედებად შეაფასა და დაგმო.