ოპოზიციაში ტრაგიკომიკურ ჟანრს ვუყურებთ - შეიძლება, კაცის კვლა, დაწვა, სიტყვისა და გამოხატვის თავისუფლებაში შეიყვანონ, - ამის შესახებ უმრავლესობის ლიდერმა, ირაკლი კირცხალიამ ჟურნალისტებთან განაცხადა.

მისი თქმით, ოპოზიციამ ჯერ წაახალისა „მოლოტოვის კოქტეილის“ სროლა, შემდეგ ექსტრემიზმი, რაც ტერორიზმში გადაიზარდა და ახლა „ენა უტრიალდებათ და ამბობენ, რომ 4 ოქტომბრის მოვლენები გადატრიალება არ ყოფილა“.

„ოპოზიციაში ტრაგიკომიკურ ჟანრს ვუყურებთ. შეიძლება, კაცის კვლა, დაწვა, სიტყვისა და გამოხატვის თავისუფლებაში შეიყვანონ. პოლიციელის დაწვა სიტყვის თავისუფლებაში შეიყვანეს და წაახალისეს. ზოგიერთი დიპლომატი „მოლოტოვის კოქტეილის“ გამოსახულებიანი ბანერებით დარბოდა. ლაზარე გრიგორიადისის „გაგმირება“ გვახსოვს. შემდეგ „ხანდაზმულმა ლაზარემ“, ელისაშვილს ვგულისხმობ, რა სცადა, ისიც ვნახეთ. ჯერ წაახალისეს „მოლოტოვის კოქტეილის“ სროლა, შემდეგ ძალადობა და ექსტრემიზმი, რაც ტერორიზმში გადაიზარდა. პირდაპირ გადატრიალების დაანონსებულ მცდელობაზე დღეს ამ უტიფრებს ენა უტრიალდებათ და ამბობენ, რომ ეს გადატრიალება არ ყოფილაო“, - განაცხადა კირცხალიამ.