„ნაციონალური მოძრაობა“ არის სამწუხარო წარსული და სამწუხარო წარსულს ვერავინ ვერასდროს დააბრუნებს აწმყოში - საჯარო მტკიცებულებები არსებობს, რომ ასეთი ტიპის პირდაპირი ფაშისტური „პოლიტიკური ორგანიზაცია“ არ უნდა არსებობდეს, - ამის შესახებ „ხალხის ძალის“ დეპუტატმა, გურამ მაჭარაშვილმა ჟურნალისტებთან განაცხადა, რითაც „ნაციონალური მოძრაობის“ მიერ საკონსტიტუციო სასამართლოში შეტანილ სარჩელს გამოეხმაურა.

მისივე თქმით, „ნაციონალურმა მოძრაობამ“ თავად აიკრძალა თავი.

„ნაციონალური მოძრაობა“ არის სამწუხარო წარსული და სამწუხარო წარსულს ვერავინ ვერასდროს დააბრუნებს აწმყოში. საგამოძიებო კომისიამ დავიბარეთ ის ადამიანები, რომლებმაც ასევე გაიხსენეს სამწუხარო წარსული, რაც „ნაცმოძრაობამ“ დაატეხა საქართველოს და საზოგადოებას. ამიტომაც ჩვენ შევიტანეთ სარჩელი, რომ სამართლებრივადაც კი აღარ იყოს და არ არსებობდეს რისკი იმ რეჟიმის გამეორების, რაც შექმნა „ნაციონალურმა მოძრაობამ“, რაც, დიდი ალბათობით, საკონსტიტუციო სასამართლოს გადაწყვეტილებით გაკეთდება. საჯარო მტკიცებულებები არსებობს, რომ ასეთი ტიპის პირდაპირი ფაშისტური „პოლიტიკური ორგანიზაცია“ არ უნდა არსებობდეს. ახლა სამწუხარო წარსულმა რაც არ უნდა იფართხალოს, ეს არის მხოლოდ და მხოლოდ მცდელობები და მეტი არაფერი. „ნაციონალური მოძრაობა“ აკრძალა „ნაციონალურმა მოძრაობამ“, მისმა ქმედებებმა, მისმა დანაშაულებმა და არა ჩვენ“, - განაცხადა მაჭარაშვილმა.

ცნობისთვის, „ერთიანობა - ნაციონალურმა მოძრაობამ" საკონსტიტუციო სასამართლოში „ქართული ოცნების" მიერ მიღებული იმ კანონების წინააღმდეგ სარჩელი შეიტანა, რომლებიც პოლიტიკურ პარტიებსა და კონკრეტულ პირებს პოლიტიკური საქმიანობის განხორციელებას უკრძალავს.

მანამდე, პარლამენტის 88 წევრმა საქართველოს საკონსტიტუციო სასამართლოს 3 პოლიტიკური პარტიის („ერთიანობა - ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „ძლიერი საქართველო - ლელო, ხალხისთვის, თავისუფლებისთვის!“) პოლიტიკური პარტიების საქმიანობის კონსტიტუციურობის დადგენისა და აკრძალვის საკითხზე მიმართა.