საქართველოს პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენა, შენახვის, დიდი ოდენობით ნარკოტიკული საშუალების უკანონო რეალიზაციის ხელშეწყობის ფაქტებზე ორ პირს ბრალდება წარუდგინა. ამის შესახებ ინფორმაციას პროკურატურა ავრცელებს.

როგორც გავრცელებულ ინფორმაციაშია ნათქვამი, ერთ პირს ასევე ბრალდება ცეცხლსასროლი იარაღების და საბრძოლო მასალის მართლსაწინააღმდეგოდ შეძენა, შენახვის ფაქტზე წარედგინა.

“შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულებმა უკანონოდ შეიძინეს განსაკუთრებით დიდი ოდენობით, 94.7911 გრ. ნარკოტიკული საშუალება “მეთადონი (ფუძე)” და 0,4251 გრ. “ალფა პვპ”, რომელთა ნაწილიც რეალიზაციის მიზნით დააფასოვეს.

სამართალდამცველებმა ბრალდებულების საცხოვრებელი სახლის ჩხრეკის შედეგად განსაკუთრებით დიდი ოდენობით ნარკოტიკული საშუალება, ნარკოტიკული საშუალების დაფასოებისთვის საჭირო ნივთები, ორი ცეცხლსასროლი იარაღი და ვაზნები ამოიღეს.

დაკავებულებს ბრალდება საქართველოს სისხლის სამართლის კოდექსის 260-ე მუხლის მე-2 ნაწილის “ბ” და მე-3 ნაწილის “ა” ქვეპუნქტებით (განსაკუთრებით დიდი ოდენობით ნარკოტიკული საშუალების უკანონო შეძენა შენახვა ჩადენილი წინასწარი შეთანხმებით ჯგუფის მიერ) და 260 კვარტა მუხლის მე-5 ნაწილის “ბ” და მე-6 ნაწილის “ა” ქვეპუნქტებით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა ჩადენილი წინასწარი შეთანხმებით ჯგუფის მიერ) წარედგინათ. ერთ პირს ასევე ბრალდება 236-ე მუხლის მე-3 ნაწილით (ცეცხლსასროლი იარაღის და საბრძოლო მასალის მართლსაწინააღმდეგო შეძენა და შენახვა) წარედგინა. მათთვის წარდგენილი ბრალდება სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურის შუამდგომლობის საფუძველზე სასამართლომ ბრალდებულებს აღკვეთის ღონისძიების სახით პატიმრობა უკვე შეუფარდა”, - ნათქვამია ინფორმაციაში.