უკრაინელმა მებრძოლებმა დონეცკის ოლქში, პოკროვსკის ჩრდილოეთ ნაწილში, 16 კვადრატულ კილომეტრ ტერიტორიაზე კონტროლის აღდგენა მოახერხეს, - ამის შესახებ უკრაინის შეიარაღებული ძალების მთავარსარდალმა ალექსანდრ სირსკიმ განაცხადა.

სირსკიმ მონაწილეობა მიიღო უკრაინის თავდაცვის საკითხებზე საკონტაქტო ჯგუფის 32-ე შეხვედრაში და ფრონტზე არსებულ რთულ ვითარებაზე ისაუბრა.

მისი განცხადებით, მნიშვნელოვანი დანაკარგების მიუხედავად, რუსეთის არმია არ წყვეტს შეტევით ოპერაციებს, თუმცა მნიშვნელოვან ოპერატიულ წარმატებას ვერ აღწევს.

სირსკის თქმით, უკრაინის არმიამ მოახერხა კუპიანსკიდან ოკუპანტების უკან დახევა და ქალაქის ტერიტორიის თითქმის 90 პროცენტზე კონტროლის დაწესება.

„მტერი პოკროვსკის აღებას 17 თვეზე მეტია ცდილობს. თუმცა, უკრაინული ქვედანაყოფები ხაზს ინარჩუნებენ და ინიციატივას იბრუნებენ. კონტრშეტევითი მოქმედებების შედეგად, ქალაქის ჩრდილოეთ ნაწილში 16 კვადრატულ კილომეტრზე კონტროლი აღვადგინეთ. ასევე, დავიბრუნეთ 56 კვადრატული კილომეტრი ტერიტორია პოკროვსკის დასავლეთით მდებარე გრიშინოს, კოტლინოსა და უდაჩნოეს დასახლებებში“,- აღნიშნა სირსკიმ.