Politico - აშშ-სა და რუსეთის წარმომადგენლების შეხვედრა, უკრაინაში მიმდინარე ომთან დაკავშირებით, მაიამიში ამ შაბათ-კვირას გაიმართება
აშშ-სა და რუსეთის ოფიციალური პირები მაიამიში შეხვედრას ამ შაბათ-კვირას გამართავენ, - ინფორმაციას Politico ავრცელებს.
გამოცემა წერს, რომ აშშ-მა გააძლიერა ზეწოლა უკრაინაზე, რათა ომის დასრულების მიზნით დათმობებზე წავიდეს. Politico-ს წყაროების განცხადებით, გეგმები კვლავ ცვალებადია, მაგრამ თუ ამ შაბათ-კვირას განხორციელდება, ადმინისტრაცია მოლაპარაკებების ბოლო რაუნდის შედეგებს რუს ოფიციალურ პირებს წარუდგენს.
საკითხის შესახებ ინფორმირებულმა ერთ-ერთმა წყარომ Politico-ს განუცხადა, რომ რუსეთის დელეგაციაში, სავარაუდოდ, რუსეთის სუვერენული ფონდის ხელმძღვანელი კირილ დმიტრიევი იქნება. ამერიკულ მხარეს კი, სავარაუდოდ, დონალდ ტრამპის ადმინისტრაციის სპეციალური წარმომადგენელი სტივ ვიტკოფი და ტრამპის სიძე ჯარედ კუშნერი წარმოადგენენ.
