ლიეტუვაში მაუწყებლობის შესახებ კანონში ცვლილებების წინააღმდეგ საპროტესტო აქციაზე 10 000 ადამიანი გამოვიდა, - ინფორმაციას ლიეტუვის საზოგადოებრივი მაუწყებელი LRT-ი ავრცელებს.

ლიეტუვის საზოგადოებრივი მაუწყებლის მუშაობის შესახებ კანონში შესატანი ცვლილებების წინააღმდეგ საპროტესტო აქცია ვილნიუსში, დამოუკიდებლობის მოედანზე გაიმართა.

„ხელები შორს სიტყვის თავისუფლებისგან“, - სკანდირებდა ხალხი.

სეიმმა გასულ კვირას მაუწყებლობის შესახებ კანონში შესატან ცვლილებებს დაუჭირა მხარი, რომლებიც LRT-ის ხელმძღვანელის გათავისუფლებას ამარტივებს.

ასევე, მთავრობამ დაჩქარებული პროცედურა მოითხოვა, რათა სეიმმა ცვლილებები შობამდე დაამტკიცოს.

„სოციალ-დემოკრატების“, „ნემანის განთიადისა“ და „ლიეტუველი ფერმერების, მწვანეთა და ქრისტიანული ოჯახების კავშირის“ პარტიების მიერ მხარდაჭერილი ცვლილებების მიღების შემთხვევაში LRT-ის ხელმძღვანელის გათავისუფლება მცირე უმრავლესობის საფუძველზე, ფარული კენჭისყრის მეშვეობით იქნება შესაძლებელი.