მნიშვნელოვანია, ევროკავშირისგან ეს პოლიტიკური მხარდაჭერა გამოვიყენოთ იმისთვის, რომ სრულყოფილად იყოს გამოძიებული, რა ნივთიერებით მოწამლა საკუთარი მოქალაქეები ბიძინა ივანიშვილის რეჟიმმა გასულ წელს, - ასე შეაფასა „ძლიერი საქართველო-ლელოს“ ერთ-ერთმა ლიდერმა, სალომე სამადაშვილმა ევროპარლამენტში საქართველოს საკითხზე გამართული დებატები.

როგორც სამადაშვილმა განაცხადა, მნიშვნელოვანი იყო ის მოწოდებები, რაც სავარაუდოდ, ქიმიური იარაღის გამოყენების თაობაზე საერთაშორისო გამოძიების უზრუნველყოფას ეხებოდა.

„ევროპარლამენტში მოვისმინეთ, რომ დღეს ევროკავშირი ძალიან სერიოზულად შეშფოთებულია საქართველოში ადამიანის უფლებების დარღვევის თვალსაზრისით სულ უფრო დამძიმებული ვითარების გამო. ძალიან მნიშვნელოვანი იყო ის მოწოდებები, რაც საერთაშორისო გამოძიების უზრუნველყოფის თაობაზე გაისმა, რაც საქართველოს მოქალაქეების წინააღმდეგ სავარაუდოდ, ქიმიური იარაღის გამოყენებას შეეხება. ძალიან მნიშვნელოვანია, ეს პოლიტიკური მხარდაჭერა ევროკავშირისგან გამოვიყენოთ იმისთვის, რომ სრულყოფილად იყოს გამოძიებული, რა ნივთიერებით მოწამლა საკუთარი მოქალაქეები ბიძინა ივანიშვილის რეჟიმმა გასულ წელს“, - განაცხადა სალომე სამადაშვილმა.