უნდა მოვიდეს დრო, როცა ჩვენ ჩვენს მეგობრებსა და კოლეგებს ციხის კარებთან კი არ შევხვდებით და დავხვდებით, არამედ დემოკრატიულ არჩევნებზე, - ამის შესახებ პარტია "თავისუფლების მოედნის” ლიდერმა, ლევან ცუცქირიძემ განაცხადა, რითაც „კოალიცია ცვლილებისთვის“ ერთ-ერთი ლიდერის, ზურაბ ჯაფარიძის, რუსთავის ციხიდან დათქმულ დროზე რამდენიმე საათით ადრე გამოშვებას გამოეხმაურა.

მისი თქმით, „ვინც პოლიტიკოსები ასე გამოამწყვდია ციხეში, მათ პასუხი უნდა აგონ“.

„ვაპირებდი, რომ ზურას ციხის კარებთან დავხვედროდი, მაგრამ ადრე გამოუშვეს, რომ ვითომ ჩაეშალათ დახვედრა. არაუშავს სახლთან დავხვდებით და შევხვდებით.

საქართველოში უნდა მოვიდეს დრო, როცა ჩვენ ჩვენს მეგობრებსა და კოლეგებს ციხის კარებთან კი არ შევხვდებით და დავხვდებით, არამედ დემოკრატიულ არჩევნებზე. სწორედ ამისთვის ვიბრძვით, მეც, ზურაც და ყველა“,- განაცხადა ლევან ცუცქირიძემ.

ცნობისთვის, „კოალიცია ცვლილებისთვის“ ერთ-ერთმა ლიდერმა, ზურაბ გირჩი ჯაფარიძემ 7-თვიანი პატიმრობის შემდეგ რუსთავის ციხე დატოვა. ზურაბ გირჩი ჯაფარიძე 22 მაისს, სასამართლოს სხდომათა დარბაზში დააკავეს. ის საქართველოს პარლამენტის დროებით საგამოძიებო კომისიაზე ახსნა-განმარტების მისაცემად იყო დაბარებული, სადაც არ გამოცხადდა. ჯაფარიძეს ბრალი სისხლის სამართლის კოდექსის 349-ე მუხლით წარუდგინეს, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს.