აშშ-მა ვენესუელის სანაპიროსთან კიდევ ერთი გემი დააკავა, - ინფორმაციას CNN-ი ავრცელებს.

CNN-ის ცნობით, გემი პანამის დროშის ქვეშ მცურავი ტანკერია, რომელსაც ვენესუელიდან ნავთობი გადაჰქონდა და აზიისკენ მიცურავდა.

ასევე, გამოცემა წერს, რომ ტანკერი აშშ-ის სანქციების ქვეშ არ არის.

აშშ-ის შიდა უსაფრთხოების მდივნის, კრისტი ნოემის განცხადებით, ნავთობტანკერი სანაპირო დაცვამ თავდაცვის დეპარტამენტის მხარდაჭერით დააკავა.

„აშშ სანქცირებული ნავთობის უკანონო გადაზიდვის წინააღმდეგ მოქმედებას გააგრძელებს, რომელიც რეგიონში ნარკოტერორიზმის დასაფინანსებლად გამოიყენება“, - აღნიშნა ნოემმა.

ცნობისთვის, ეს მიმდინარე თვეში ვენესუელის სანაპიროსთან ამერიკელი სამხედროების მიერ გემის დაკავების მეორე შემთხვევაა. 10 დეკემბერს აშშ-მა ნავთობტანკერი Skipper-ი დააკავა, რომელიც ირანთან კავშირის გამო სანქციების ქვეშ იმყოფება.

ამასთან, მიმდინარე კვირაში აშშ-ის პრეზიდენტმა, დონალდ ტრამპმა ვენესუელაში შემავალი და გამავალი ყველა სანქცირებული ნავთობტანკერის სრული ბლოკადა გამოაცხადა.