მადურომ მოპარული ამერიკული აქტივები უნდა დააბრუნოს, - ამის შესახებ აშშ-ის თავდაცვის მდივანი, პიტ ჰეგსეტი სოციალურ ქსელში წერს.

„პრეზიდენტმა ტრამპმა ნათლად განაცხადა: ვენესუელაში შემავალი და გამავალი სანქცირებული ნავთობტანკერების ბლოკადა ძალაში დარჩება, ვიდრე მადუროს კრიმინალური რეჟიმი ყველა მოპარულ ამერიკულ აქტივს არ დააბრუნებს“, - წერს ჰეგსეტი X-ზე.

მისი თქმით, თავდაცვის დეპარტამენტი „კრიმინალური ქსელების განადგურების მიზნით საზღვაო ოპერაციებს გააგრძელებს“.

შეგახსენებთ, დღეს აშშ-ის სანაპირო დაცვამ თავდაცვის დეპარტამენტთან თანამშრომლობით, ვენესუელის სანაპიროსთან კიდევ ერთი ნავთობტანკერი დააკავა. ეს მიმდინარე თვეში ვენესუელის სანაპიროსთან ამერიკელი სამხედროების მიერ ტანკერის დაკავების მეორე შემთხვევაა.