არასამთავრობო ორგანიზაცია „სოციალური სამართლიანობის ცენტრის“ დირექტორის, თამთა მიქელაძის განცხადებით, ოკუპირებულ ტერიტორიაზე დაკავებული საქართველოს მოქალაქე, თამარ მეარაყიშვილი ადვოკატმა მოინახულა.

როგორც მიქელაძე ,,ფეისბუქზე” წერს, თამარ მეარაყიშვილი საკვების მიღებაზე პროტესტის ნიშნად უარს ამბობს.

,,ვიცი, რომ ბევრს გაინტერესებთ თამარ მეარაყიშვილის ამბავი.

თამართან დღეს იყო შესული ადვოკატი. ადვოკატის თქმით, თამარი ნორმალურად არის, მაგრამ უარს ამბობს საკვების მიღებაზე პროტესტის ნიშნად. იმედი მაქვს, რომ ამაზე თამარი უარს იტყვის შემდეგ დღეებში.

ხვალ იქნება აღკვეთის ღონისძიების გამოყენების თაობაზე სასამართლო სხდომა და ამ დროს ადვოკატი მოიპოვებს წვდომას მასალებზე და იმედი მაქვს, რომ უფრო მეტი გვეცოდინება მის საქმეზე.

ყველაფერი უნდა გავაკეთოთ, რომ თამარი გათავისუფლდეს.

ძალიან მნიშვნელოვანია ქართული მედიის აქტიურობა ამ საქმეზე და საერთაშორისო ინტერესის გაზრდა მის მხარდასაჭერად”,- აცხადებს თამთა მიქელაძე.

ინფორმაციისთვის, ოკუპირებულ ცხინვალის ე.წ. გენერალური პროკურატურის ინფორმაციით, საქართველოს მოქალაქე, თამარ მეარაყიშვილი ჯაშუშობის ბრალდებით დააკავეს.

დღეს კი სუს-მა განცხადება გაავრცელა, სადაც ნათქვამია, რომ “ცხინვალიდან ცხელი ხაზით დაადასტურეს ოკუპირებულ ტერიტორიაზე მუდმივად მცხოვრები საქართველოს მოქალაქის, თამარ მეარაყიშვილის უკანონოდ დაკავების ფაქტი”.