აშშ-მა ყოფილ ევროკომისარს სავიზო შეზღუდვები დაუწესა, - ინფორმაციას Reuters-ი ავრცელებს.

აშშ-ის სახელმწიფო დეპარტამენტმა შიდა ბაზრის საკითხებში ყოფილ ევროკომისარს, ტიერი ბრეტონს და დეზინფორმაციასთან მებრძოლ ოთხ აქტივისტს ქვეყანაში შესვლა აუკრძალა.

სახელმწიფო დეპარტამენტის განცხადებით, აღნიშნული პირები ევროკავშირის მასშტაბით ამერიკული სოციალური მედია პლატფორმებისთვის ცენზურის დაწესებაში მონაწილეობდნენ.

„აღნიშნულმა რადიკალმა აქტივისტებმა და იარაღად ქცეულმა არასამთავრობო ორგანიზაციებმა უცხო ქვეყნების მიერ ცენზურის გამოყენებას ხელი შეუწყვეს - თითოეულ შემთვევაში მათი სამიზნე ამერიკული კომპანიები იყო“, - ნათქვამია აშშ-ის სახელმწიფო დეპარტამენტის განცხადებაში.

საჯარო დიპლომატიის საკითხებში აშშ-ის სახელმწიფო მდივნის მოადგილემ, სარა როჯერსმა განაცხადა, რომ ფრანგი ბიზნესმენი, ტიერი ბრეტონი, რომელიც შიდა ბაზრის საკითხებში ევროკომისრის თანამდებობას 2019-2024 წლებში იკავებდა, „ციფრული სერვისების აქტის“ (DSA) მთავარი ინიციატორია.

ბრეტონის გარდა აშშ-ში შესვლა აეკრძალათ: ციფრული სიძულვილის წინააღმდეგ ბრძოლის ცენტრის აღმასრულებელ დირექტორს იმრან აჰმედს, გერმანული ორგანიზაცია HateAid-ის ხელმძღვანელებს ჯოზეფინ ბალონსა და ანა-ლენა ფონ ჰოდენბერგს, ასევე, გლობალური დეზინფორმაციის ინდექსის (GDI) თანადამფუძნებელს კლერ მელფორდს.

შეგახსენებთ, მიმდინარე თვის დასაწყისში ევროკომისიამ ილონ მასკის სოციალური პლატფორმა X ევროკავშირის ციფრული უსაფრთხოების რეგულაციების დარღვევაში დაადანაშაულა და „ციფრული სერვისების აქტის“ ფარგლებში 120 მილიონი ევროს ოდენობის ჯარიმა დაუწესა.