ადვოკატის, რობერტ გრიგალაშვილის განცხადებით, სახელმწიფო უსაფრთხოების სამსახურის ყოფილი უფროსის, გრიგოლ ლილუაშვილის საქმეზე გაუთქმელობაზე მოაწერა ხელი, შესაბამისად, საქმის დეტალებზე ვერ ისაუბრებს.

ადვოკატი აცხადებს, რომ მისი დაცვის ქვეშ მყოფის პოზიცია არ არის შეცვლილი, ის წარდგენილ ბრალს არ აღიარებს, შესაბამისად, დაცვის მხარე აღკვეთის ღონისძიების გარეშე დატოვებას მოითხოვს, თუმცა მოისმენს პროკურატურის პოზიციასაც და შესაძლოა ალტერნატივა იყოს შეთავაზებული.

რაც შეეხება საქმეში მოწმეთა ჩვენებებს, კითხვაზე, ადასტურებს, თუ არა, რომ არიან მოწმეები, რომლებიც პირდაპირ „ადებენ ხელს“ ლილუაშვილს, მათ შორის ყოფილი მაღალჩინოსანი რომეო მიქაუტაძე, ადვოკატმა თქვა, რომ „არ დაადასტურებს“.

„არ დავადასტურებ. ჩვენებების ქონა და დადასტურება, სხვადასხვაა. ჩვენებები არის, გიდასტურებთ”,

ადვოკატმა გაიმეორა, რომ საქმის დეტალებზე ვერ ისაუბრებს.

„მოდი, რადგან გაუთქმელობაზე მაქვს ხელი მოწერილი, მეტზე არაფერზე შევჯერდები. ის, რაც არის აღკვეთის ღონისძიების მიზნები და საფუძვლები - ჯერ მოვისმენთ პროკურატურა რა საკითხს დააყენებს. ჩვენც გვექნება არგუმენტები”, - განაცხადა ადვოკატმა.