გეთანხმებით, რომ რთულია მარტომ ჩაიდინო ასეთი დანაშაული - გამოძიებამ უნდა დაადგინოს ყველაფერი, - ამის შესახებ საქართველოს პრემიერ-მინისტრმა, ირაკლი კობახიძემ ჟურნალისტებთან განაცხადა, რითაც სუს-ის ყოფილი უფროსის, გრიგოლ ლილუაშვილის საქმეზე დასმულ კითხვას უპასუხა.

მისი თქმით, საქმეზე გამოძიება გრძელდება.

„გამოძიებას სჭირდება თავისი დრო, გამოძიება წარიმართა, გამოძიებამ დადო პირველადი შედეგები და გამოძიება გაგრძელდება. ესაა, რაც შემიძლია გითხრათ, დანარჩენს უკვე გეტყვით გამოძიება,“ -განაცხადა კობახიძემ.

კითხვაზე, თუ რატომ ადევს ლილუაშვილის საქმეს „გრიფით საიდუმლო“, პრემიერი პასუხობს, რომ ინფორმაცია არ აქვს.

„არ ვიცი, უწყებებს უნდა ჰკითხოთ,“ - განაცხადა კობახიძემ.

კორუფციულ დანაშაულზე პასუხისმგებლობასთან დაკავშირებით დასმულ კითხვაზე პრემიერ-მინისტრი პასუხობს, რომ მთავარია, ხელისუფლება ახლა არის კონცენტრირებული იმაზე, რომ კორუფცია დღეს და ხვალ არ დაუშვას.

„რაღაც მომენტში გაჩნდა პრობლემა. არ შევალ დეტალებში. ამის გამო, 2023 წლის დეკემბერში, ბატონმა ბიძინა ივანიშვილმა გააკეთა მკაფიო განაცხადი, რომელიც უკავშირდებოდა შესაძლო კორუფციას. იქიდან მოყოლებული, ჩვენ აქტიურად ვიმუშავეთ და კონკრეტული ზომები მივიღეთ იმისთვის, რომ მიგვეღწია კორუფციის აღმოფხვრისთვის. ეს არის ის ისტორია, რომელიც თან ახლავს ამ პროცესებს. ჩვენ მთავარია, ახლა ვართ კონცენტრირებული იმაზე, რომ არ დავუშვათ კორუფცია დღეს და ხვალ. ესაა მთავარი ამოცანა. როდესაც საუბრობთ იმაზე, რომ წარსულში იყო რაღაც საუბრები, მინდა მოგიწოდოთ, დღეს და ხვალ თუ რამეს აღმოაჩენთ, ეგრევე აიმაღლეთ ხმა და მოგვმართეთ ჩვენ და გაგცემთ ყველაფერთან დაკავშირებით პასუხს. პასუხისმგებლები ვართ იმაზე, რომ დღეს და ხვალ, რა კითხვაც არ უნდა დაისვას, ყველაზე გაგცემთ პასუხს,“ - განაცხადა კობახიძემ.