სასამართლოში კასპის მუნიციპალიტეტში ქრთამის აღებისა და ქრთამის აღებაში დახმარების ფაქტზე ბრალდებულების პროცესი მიმდინარეობს
თბილისის საქალაქო სასამართლოში კორუფციულ და სხვა სახის დანაშაულებთან დაკავშირებით დაკავებული ორი პირის სასამართლო პროცესი მიმდინარეობს.
დღევანდელ სასამართლო პროცესზე დაკავებული პირების მიმართ აღკვეთის ღონისძიების შეფარდებაზე იმსჯელებენ.
როგორც ცნობილია, პროკურატურა დაკავებულების მიმართ აღკვეთის ღონისძიებად პატიმრობის გამოყენებას მოითხოვს.
ცნობისთვის, სახელმწიფო უსაფრთხოების სამსახურის ანტიკორუფციული სააგენტოს თანამშრომლების მიერ საქართველოს სხვადასხვა რეგიონში ჩატარებული ანტიკორუფციული ღონისძიების შედეგად, 4 სხვადასხვა სისხლის სამართლის საქმეზე გამოვლენილ კორუფციულ და სხვა სახის დანაშაულებთან დაკავშირებით, გუშინ 4 პირი დააკავა, ხოლო, ჯამში, პასუხისგებაში მიეცა 11 ადამიანი.
კერძოდ, საქმე ეხება, აღნიშნული გამოძიების მეორე ეპიზოდს - კასპის მუნიციპალიტეტში ქრთამის აღებისა და ქრთამის აღებაში დახმარების ფაქტს, რომლისთვისაც დაკავებულნი არიან გარემოს დაცვისა და სოფლის მეურნეობის სამინისტროს სსიპ სურსათის ეროვნული სააგენტოს თანამშრომელი და ერთი მოქალაქე, რომლის დახმარებითაც სააგენტოს თანამშრომელმა, 560 ლარის სანაცვლოდ, დაამზადა საქონლის ხორცის რეალიზაციისთვის საჭირო ყალბი მოწმობები ისე, რომ არც ხორცის ვარგისიანობა და არც მომხმარებლისთვის მიწოდებული პროდუქცია არ შეუმოწმებია.
