აზერბაიჯანის რესპუბლიკის საგარეო საქმეთა მინისტრ ჯეიჰუნ ბაირამოვსა და საქართველოს საგარეო საქმეთა მინისტრ მაკა ბოჭორიშვილს შორის სატელეფონო საუბარი შედგა, - ინფორმაციას აზერბაჯანის საგარეო უწყება ავრცელებს.

„მინისტრებმა განიხილეს ორ ქვეყანას შორის მეგობრული და სტრატეგიული პარტნიორობის ურთიერთობების ამჟამინდელი მდგომარეობა და პერსპექტივები. ხაზგასმით აღინიშნა, რომ ჩვენს ქვეყნებს შორის უმაღლეს დონეზე არსებულმა პოლიტიკურმა დიალოგმა, ასევე განხორციელებულმა ინტენსიურმა ვიზიტებმა ხელი შეუწყო ჩვენი ურთიერთობების შემდგომ განმტკიცებას“, - აღნიშნულია ინფორმაციაში.

უწყების ცნობით, მხარეებმა ხაზი გაუსვეს მომავალ წელს მაღალი დონის პოლიტიკური კონტაქტების შემდგომი გაფართოების მნიშვნელობას.

„მხარეებმა განიხილეს რეგიონში ვაჭრობისა და კომუნიკაციის საკითხები და მიესალმნენ ამ მიმართულებით გაწეულ ძალისხმევას. კმაყოფილებით აღნიშნეს აზერბაიჯანული ნავთობპროდუქტების საქართველოს გავლით სომხეთში ექსპორტის ტარიფებთან დაკავშირებით მიღწეული შეთანხმება და ხაზი გაუსვეს ამ მიმართულებით მუშაობის გაგრძელების მნიშვნელობას. მინისტრმა ჯეიჰუნ ბაირამოვმა მადლობა გადაუხადა საქართველოს ხელმძღვანელობას საკითხის დროულად გადაწყვეტისთვის“, - აღნიშნულია ინფორმაციაში.

უწყების ცნობით, მინისტრებმა გაცვალეს მოსაზრებები სხვა ორმხრივ და რეგიონულ საკითხებზე, გულწრფელი მილოცვები გადასცეს ერთმანეთს მოახლოებულ ახალ წელთან დაკავშირებით და გამოთქვეს რწმენა, რომ ორ ქვეყანას შორის ურთიერთობები მომავალ წელს კიდევ უფრო გაძლიერდება.