სომხეთი და თურქეთი დიპლომატიური პასპორტების მფლობელებისთვის სავიზო პროცედურების გამარტივების შესახებ შეთანხმდნენ, - ინფორმაციას სომხური მედია ქვეყნის საგარეო საქმეთა სამინისტროზე დაყრდნობით ავრცელებს.

სომხეთის საგარეო უწყების ცნობით, თურქეთთან ნორმალიზაციის პროცესში მიღწეული შეთანხმებების ფარგლებში სავიზო პროცედურები დიპლომატიური, სპეციალური და სამსახურებრივი პასპორტების მფლობელებისთვის გამარტივდება.

„სომხეთი და თურქეთი კიდევ ერთხელ ადასტურებენ თავიანთ ვალდებულებას, რომ ორ ქვეყანას შორის ნორმალიზაციის პროცესი ყოველგვარი წინაპირობების გარეშე გააგრძელონ“, - აცხადებს სომხეთის საგარეო საქმეთა სამინისტრო.

უწყებაში განაცხადეს, რომ დიპლომატიური, სპეციალური და სამსახურებრივი პასპორტების მფლობელები ელექტრონული ვიზების უფასოდ აღებას 2026 წლის 1-ელი იანვრიდან შეძლებენ.