თუ ირანი თავიდან შეიარაღებას შეეცდება, მაშინ მას დავარტყამთ, - ამის შესახებ აშშ-ის პრეზიდენტმა, დონალდ ტრამპმა ფლორიდაში, ისრაელის პრემიერ-მინისტრთან, ბენიამინ ნეთანიაჰუსთან შეხვედრის დაწყებამდე ჟურნალისტებს განუცხადა.

„გავიგე, რომ ირანი კვლავ ცდილობს შეიარაღებას და თუ ამას აკეთებენ, მაშინ დარტყმა მოგვიწევს და ჩვენ მათ სასტიკად დავარტყამთ. მაგრამ, იმედია, ეს არ ხდება. გავიგე, რომ ირანს შეთანხმება სურს. ეს უფრო ჭკვიანურია. შეთანხმება ადრე უნდა დაედოთ, სანამ მათზე ძლიერ შეტევას განვახორციელებდით“, - განაცხადა ტრამპმა.

დონალდ ტრამპმა ღაზაში ცეცხლის შეწყვეტის შეთანხმების შესახებაც ისაუბრა და აღნიშნა, რომ „ჰამასის“ განიარაღება უნდა მოხდეს.

„ცეცხლის შეწყვეტის მეორე ფაზაზე გადასვლამდე „ჰამასმა“ იარაღი უნდა დაყაროს. შეთანხმება მეორე ფაზაზე შეიძლება ძალიან სწრაფად გადავიდეს, მაგრამ ამისთვის განიარაღებაა აუცილებელი“, - აღნიშნა აშშ-ის პრეზიდენტმა.