Reuters - ირანში მიმდინარე საპროტესტო აქციებზე ქვეყნის უსაფრთხოების ძალების წევრი დაიღუპა
ირანში მიმდინარე საპროტესტო აქციებზე ქვეყნის უსაფრთხოების ძალების წევრი დაიღუპა, - ინფორმაციას Reuters-ი ირანის სახელმწიფო მედიაზე დაყრდნობით ავრცელებს. ირანის სახელმწიფო მედიის ცნობით, მოხალისეობრივი სამხედრო დაჯგუფების „ბასიჯის“ წევრი ქალაქ კუჰდაშტში დაიღუპა.
Reuters-ი წერს, რომ დაჯგუფება „ბასიჯს“ ირანის რევოლუციის გუშაგთა კორპუსი დემონსტრაციების ჩასახშობად ხშირად იყენებს.
შეგახსენებთ, ირანში ინფლაციისა და ვალუტის დევალვაციის გამო საპროტესტო აქციები და გაფიცვები უკვე მეხუთე დღეა მიმდინარეობს.
პროტესტი კვირას დაიწყო მას შემდეგ, რაც თეირანის დიდ ბაზარზე მაღაზიების მეპატრონეები გაიფიცნენ, როდესაც ირანული რიალი აშშ დოლართან მიმართებაში რეკორდულად დაბალ ნიშნულზე დაეცა. მოგვიანებით, დემონსტრაციები სხვა ქალაქებშიც გაგრძელდა. ქვეყნის უსაფრთხოების ძალებმა დემონსტრანტების დასაშლელად ცრემლსადენი გაზი გამოიყენეს. სახელმწიფო მედიის ცნობით, საპროტესტო აქციებზე სტუდენტები დააკავეს.
ირანის მთავრობის წარმომადგენელმა, ფატიმე მოჰაჯერანიმ განაცხადა, რომ ხელისუფლება პროფკავშირებისა და ვაჭრების წარმომადგენლებთან პირდაპირ დიალოგს გამართავს.
