აშშ-ის მიერ ვენესუელაზე განხორციელებული თავდასხმის შედეგად, სულ მცირე 40 ადამიანი დაიღუპა, მათ შორის სამხედრო მოსამსახურეები და მშვიდობიანი მოქალაქეები, - ინფორმაციას The New York Times-ი ვენესუელელ მაღალჩინოსანზე დაყრდნობით ავრცელებს, რომელმაც გამოცემასთან ანონიმურობის დაცვის პირობით ისაუბრა.

პრეზიდენტმა ტრამპმა შაბათს Fox News-ზე საუბრისას განაცხადა, რომ არცერთი ამერიკელი ჯარისკაცი არ დაღუპულა, თუმცა, გამოთქვა ვარაუდი, რომ რამდენიმე სამხედრო მოსამსახურე დაშავდა. გაერთიანებული შტაბების ხელმძღვანელმა, გენერალმა დენ კეინმა მარ-ა-ლაგოში, ტრამპთან ერთად გამართულ პრესკონფერენციაზე განაცხადა, რომ აშშ-ის ვერტმფრენებს, რომლებიც პრეზიდენტ ნიკოლას მადუროს და მისი მეუღლის გამოსაყვანად მოძრაობდნენ, ცეცხლი გაუხსნეს. გენერალმა აღნიშნა, რომ ერთ ვერტმფრენს დაარტყეს, მაგრამ ფრენა შესაძლებელი იყო და რომ ყველა ამერიკული თვითმფრინავი „შინ დაბრუნდა“.

ორი ამერიკელი ოფიციალური პირის თქმით, რომლებმაც ანონიმურობის პირობით ისაუბრეს, მადუროს დაკავების ოპერაციის დროს დაახლოებით ექვსი ჯარისკაცი დაშავდა.