ოჰაიოში მამაკაცმა ჯეი დი ვენსის სახლი დააზიანა, ეჭვმიტანილი დაკავებულია, - ინფორმაციას Fox News-ი აშშ-ის საიდუმლო სამსახურზე დაყრდნობით ავრცელებს.

აშშ-ის საიდუმლო სამსახურის განცხადებით, მამაკაცმა ცინცინატში აშშ-ის ვიცე-პრეზიდენტის, ჯეი დი ვენსის ქონება დააზიანა, კერძოდ საცხოვრებელი სახლის ფანჯრები ჩაამსხვრია.

„ინციდენტის დროს რეზიდენციაში არავინ იმყოფებოდა. ვიცე-პრეზიდენტი და მისი ოჯახი ოჰაიოში არ იმყოფებოდნენ“, - აცხადებს აშშ-ის საიდუმლო სამსახური.

ვენსის წარმომადგენელმა Fox News-სთან საუბარში აღნიშნა, რომ ვიცე-პრეზიდენტი ოჯახთან ერთად ცინცინატში გასულ შაბათ-კვირას იმყოფებოდა, თუმცა ახლა ვაშინგტონშია.

საიდუმლო სამსახურის მიერ დაკავების შემდეგ ეჭვმიტანილი ცინცინატის პოლიციაში გადაიყვანეს.

მედიის ინფორმაციით, 26 წლის უილიამ დეფურს ბრალი ვანდალიზმსა და სამსახურებრივი საქმიანობისთვის ხელის შეშლაში წაუყენეს.