აშშ-ის პრეზიდენტის დონალდ ტრამპის განცხადებით, მიაჩნია, რომ აშშ-ის ნავთობის ინდუსტრიას ვენესუელაში გაფართოებული ოპერაციების ამოქმედება 18 თვეზე ნაკლებ დროში შეუძლია.

„ვფიქრობ, რომ ამის გაკეთება უფრო ნაკლებ დროში შეგვიძლია, მაგრამ დიდ თანხასთან იქნება დაკავშირებული. უზარმაზარი თანხის დახარჯვა იქნება საჭირო, ნავთობკომპანიები მას დახარჯავენ, შემდეგ კი ჩვენგან ან შემოსავლების მეშვეობით აუნაზღაურდებათ“, - განუცხადა ტრამპმა NBC News-ს.

ტრამპმა არ დააკონკრეტა რა თანხა დაუჯდებათ კომპანიებს ვენესუელას მოძველებული ნავთობის ინფრასტრუქტურის შეკეთება და განახლება.

„ეს ძალიან მნიშვნელოვანი თანხა იქნება, რომელსაც ნავთობკომპანიები დახარჯავენ“, - აღნიშნა ტრამპმა.

აშშ-ის პრეზიდენტის თქმით, მისი აზრით, ვენესუელას ნავთობის რეზერვების გამოყენება „ნავთობის ფასებს შეამცირებს“.