რუსეთის თავდაცვის სამინისტროს განცხადებით, მათმა საჰაერო თავდაცვის სისტემებმა 129 უკრაინული დრონი მოიგერიეს და გაანადგურეს.

ამასთან, რუსული „ტელეგრამ“ არხები იუწყებიან, რომ ქვეყნის რამდენიმე რეგიონში აფეთქებების ხმები ისმოდა და რომ უპილოტო საფრენმა აპარატებმა ბაშკორტოსტანამდე მიაღწიეს.

გავრცელებული ინფორმაციით, უკრაინული დრონების სამიზნეები ნავთობის საწყობები და ქარხნები იყო, რომლებიც რუსული არმიის მომარაგებისთვის გამოიყენება.

რუსეთის ლიპეცკის ოლქის გუბერნატორმა იგორ არტამონოვმა დრონებით თავდასხმა დაადასტურა და განაცხადა, რომ სამრეწველო ობიექტში ხანძარი გაჩნდა.

„ტელეგრამ“ არხ Astra-ს ცნობით, ლიპეცკის ოლქის ქალაქ უსმანის მაცხოვრებლებმა 6 დეკემბრის ღამეს ნავთობის საწყობში აფეთქებების და ხანძრის შესახებ განაცხადეს.

მედია საჯარო ინფორმაციაზე დაყრდნობით იუწყება, რომ შპს „უსმანის ნავთობბაზა“ ნავთობპროდუქტების გაყიდვით, შენახვით და გადაზიდვით არის დაკავებული და ასევე საკუთარი სატრანსპორტო საშუალებებით უზრუნველყოფს ნავთობპროდუქტების ტრანსპორტირების მომსახურებას.

რუსეთის ლენინგრადის ოლქის გუბერნატორმა ალექსანდრე დროზდენკომ განაცხადა, რომ კომპრესორულ სადგურზე ნამსხვრევები ჩამოცვივდა. მისი ინფორმაციით, არავინ დაშავებულა.

Astra-მ ადგილობრივ მოსახლეობაზე დაყრდნობით გაავრცელა ინფორმაცია, რომ იაროსლავის ოლქის ქალაქ იაროსლავლში რამდენიმე აფეთქების ხმა გაისმა იმ ტერიტორიის მახლობლად, სადაც ნავთობგადამამუშავებელი ქარხანა და ნავთობის საწყობია განთავსებული.

აფეთქებები მოხდა პემზასა და ტვერშიც. Astra-ს ცნობით, დრონებმა, შესაძლოა, ტვერის ვაგონმშენებელ ქარხანას შეუტიეს.

დრონებმა ასევე მიაღწიეს სტერლიტამაკს (ბაშკორტოსტანი). ამ ქალაქში მდებარეობს ნავთობქიმიური ქარხანა, რომელზეც თავდასხმა არაერთხელ განხორციელდა.