საფრანგეთის, დიდი ბრიტანეთისა და უკრაინის გენერალური შტაბების უფროსებმა უკრაინისთვის უსაფრთხოების გარანტიების საკითხი განიხილეს
საფრანგეთის, დიდი ბრიტანეთისა და უკრაინის გენერალური შტაბების უფროსებმა უკრაინისთვის უსაფრთხოების გარანტიების საკითხი განიხილეს, - ინფორმაციას საფრანგეთის შეიარაღებული ძალების გენერალური შტაბის უფროსი, ფაბიენ მანდონი სოციალურ ქსელში ავრცელებს.
მანდონის ცნობით, პარიზში გამართულ შეხვედრას დიდი ბრიტანეთის გენერალური შტაბის უფროსი რიჩ ნაითონი, უკრაინის შეიარაღებული ძალების გენერალური შტაბის უფროსი ანდრეი გნატოვი და ევროპაში მოკავშირეთა შეიარაღებული ძალების მეთაური ალექსუს გრინკევიჩი ესწრებოდნენ.
„მიმდინარე სამხედრო სამუშაოები, რომლებიც კოალიციასთან და აშშ-თან თანამშრომლობით რამდენიმე თვის განმავლობაში მიმდინარეობს, ჩვენს კონტინენტზე ხანგრძლივი მშვიდობის დამყარების მიზნით პოლიტიკურ ნაბიჯებს მხარს უჭერს“, - წერს საფრანგეთის გენერალური შტაბის უფროსი X-ზე.
ცნობისთვის, პარიზში გენერალური შტატების უფროსების შეხვედრა „მსურველთა კოალიციის“ შეხვედრის წინ გაიმართა. „მსურველთა კოალიციის“ დღევანდელ შეხვედრაში 35 სახელმწიფოსა და ორგანიზაციის წარმომადგენელი მიიღებს მონაწილეობას.
