სად არის იმ პოლიტიკური გუნდის პოლიტიკური პასუხისმგებლობის საკითხი ან ელემენტარული ბოდიში, ვინც ეს ადამიანები უმაღლეს თანამდებობაზე აირჩია და ტაშს უკრავდა?! - ეს ხალხი არანაირ კორუფციას არ ებრძვის, ეს არის ერთმანეთის წინააღმდეგ ბრძოლა, კორუფციის სახელით! - ასე ეხმაურება „ლელო-ძლიერი საქართველოს“ წევრი ლევან სამუშია ირაკლი ღარიბაშვილთან საპროცესო შეთანხმების გაფორმებას, რომლის ფარგლებშიც ყოფილ პრემიერ-მინისტრს 5-წლიანი თავისუფლების აღკვეთა და დამატებით 1 მილიონის ჯარიმა დაეკისრა.

სამუშიას განცხადებით, გამამტყუნებელი განაჩენით ოფიციალურად, დადასტურებულად ვხედავთ, რომ საქართველოს ჰყავდა ორგზის პრემიერ-მინისტრი, რომელიც უკვე მსჯავრდებულია ფულის გათეთრების საქმეზე.

„საქართველოს ჰყავდა მინისტრები და მინისტრის მოადგილეები, რომლებიც მსჯავრდებული არიან კორუფციულ საქმიანობაში. საქართველოში საქართველოს მოქალაქეების აბსოლუტური უმრავლესობა კი ყოველდღიურად გადარჩენისთვის იბრძვის. ასევე არიან საქართველოს მოქალაქეები, რომლებიც ამ აღვირახსნილი კორუფციისა და თანხების მითვისების გამო საქართველოდან გაიქცნენ ან გაქცევას აპირებენ.

ამ ყველაფერზე პოლიტიკური პასუხისმგებლობა აღებული არა აქვს პოლიტიკურ გუნდს, რომელიც მათ ტაშს უკრავდა მაშინ, როდესაც ჩვენ - „ლელო - ძლიერი საქართველო“ სავარაუდო კორუფციულ ფაქტებზე ვსაუბრობდით. ჩვენ მაშინ გვეუბნებოდნენ, რომ ვიყავით მატყუარები და სიცრუის გამავრცელებლები“, - განაცხადა სამუშიამ.