მარჯანიშვილის მეტროს მიმდებარედ მოქალაქეები „ნეტგაზეთისა” და “ბათუმელების” ხელმძღვანელის, მზია ამაღლობელის სოლიდარობის ნიშნად იკრიბებიან.

„თავისუფლება მზიას", "იბრძოლეთ, სანამ გვიანი არ არის!" - ამ შინაარსის ბანერები აქვთ აქციის მონაწილეებს ადგილზე მიტანილი.

დემონსტრანტები მზია ამაღლობელის გათავისუფლების მოთხოვნით საპროტესტო მსვლელობას გამართავენ, მარშით კი პარლამენტთან გადაინაცვლებენ, სადაც უკვე ერთ წელზე მეტია, უწყვეტი პროტესტი მიმდინარეობს.

დღევანდელი საპროტესტო მსვლელობა სიმბოლურ დატვირთვას ატარებს და მზია ამაღლობელის დაკავებიდან ერთი წლისთავს უკავშირდება.

ცნობისთვის, „ბათუმელებისა“ და „ნეტგაზეთის“ დამფუძნებელი, მზია ამაღლობელი 2025 წლის 11 იანვარს დააკავეს. მას 6 აგვისტოს, 2 წლით თავისუფლების აღკვეთა შეეფარდა. კერძოდ, მას მსჯავრი წარედგინა სისხლის სამართლის კოდექსის 353-ე მუხლის პირველი ნაწილით, რომელიც ითვალისწინებს წინააღმდეგობას, მუქარას ან ძალადობას საზოგადოებრივი წესრიგის დამცველის ან ხელისუფლების სხვა წარმომადგენლის მიმართ. აღნიშნული ქმედებისთვის სასჯელის სახით გათვალისწინებულია ჯარიმა, შინაპატიმრობა 2 წლამდე ვადით და ასევე თავისუფლების აღკვეთა 2-იდან 6 წლამდე ვადით.