აშშ-ის პრეზიდენტის დონალდ ტრამპის წარმომადგენელი სტივ უიტკოფი და ტრამპის სიძე ჯარედ კუშნერი უახლოეს მომავალში მოსკოვში გამგზავრებას და რუსეთის პრეზიდენტ ვლადიმერ პუტინთან შეხვედრას გეგმავენ, - ინფორმაციას Bloomberg-ი საკითხთან დაკავშირებულ წყაროებზე დაყრდნობით ავრცელებს.

გამოცემის წყაროების ცნობით, შეხვედრა შესაძლოა ამ თვეში შედგეს, თუმცა გეგმები საბოლოო არ არის და ირანში არეულობის გამო შესაძლოა, დრო გადაიდოს.

აშშ-ის ოფიციალური პირები პუტინსა და მის გუნდს სამშვიდობო წინადადებების უახლეს პროექტს წარუდგენენ და მხარეებს შორის მოლაპარაკებები, სავარაუდოდ, აშშ-სა და ევროპის მხრიდან ნებისმიერი მომავალი შეთანხმების დაცვის უსაფრთხოების გარანტიებს და უკრაინის ომისშემდგომ რეკონსტრუქციას შეეხება.