გახარია ერთადერთია, ვინც „ოცნების“ მაღალჩინოსნებიდან გაბედა, ღიად დაუპირისპირდა და ვერც მუქარამ და თავდასხმამ ვერ გააჩერა - „ოცნების“ პატარა ბიჭებს კი ვურჩევდი, ზედმეტად ნუ მოინდომებენ, თორემ აგერ მათგან ყველაზე მონდომებულები პატრონმა საახალწლოდ უკვე გაუშვა ციხეში, - ამის შესახებ ფრაქცია „საქართველოსთვის“ თავმჯდომარე შალვა კერესელიძე სოციალურ ქსელში წერს.

კერესელიძე გასულ წელს ბათუმში, სასტუმრო „შერატონში” მომხდარ ინციდენტს ეხმაურება, სადაც ყოფილ პრემიერს ფიზიკურად გაუსწორდნენ.

„ერთი წელი გავიდა, რაც ყველამ ვნახეთ, „ოცნების“ ჩინოვნიკების ბანდის მიერ გიორგი გახარიაზე ჯგუფური ლაჩრობით განხორციელებული თავდასხმა ბათუმში - ათი ერთის წინააღმდეგ, თან როცა გულს და ზურგს მთელი სამართალდამცავი სისტემა გიმაგრებს.

ამ ჩინოვნიკებსაც და ამ სამართალდამცავ სისტემასაც საერთო ბრძანება ჰქონდათ მიღებული ერთი ადამიანისგან - თანაც საჯაროდ! ამავე სამართალდამცავ სისტემას ბოლოს მოუწია ორი სისხლის სამართლის საქმის შეთითხნა გიორგი გახარიას წინააღმდეგ.

გიორგის მე პირადად ძალიან ბევრი წელია ვიცნობ და ვინმეს მუქარის გამო უკან დახევა მისი თვისება არასდროს ყოფილა. ვისაც ასე ეგონა, ესე იგი მას საერთოდ არ იცნობს.

გახარია ერთადერთია, ვინც „ოცნების“ მაღალჩინოსნებიდან გაბედა და ღიად დაუპირისპირდა. ვერც მუქარამ და ვერც თავდასხმამ ის არ გააჩერა.

„ოცნების“ პატარა ბიჭებს ვურჩევდი, ზედმეტად ნუ მოინდომებენ, თორემ აგერ მათგან ყველაზე მონდომებულები პატრონმა უკვე გაუშვა საახალწლოდ ციხეში“, - აცხადებს კერესელიძე.